Pasaiako naturguneak
1. Pasaiako badia
Pasaiako badia, bizigarria eta jasangarria
Pasaiako badia da herriaren ardatza: lau barrutiak elkartzen ditu, portua eta naturguneak lotuz. Udalak badia herritarrentzat irekitzea du helburu, espazio atsegin, osasungarri eta jasangarrien bidez.
Portuarekin eta inguruko erakundeekin lankidetzan, Pasaia gero eta bizigarriagoa bihurtzen ari da, herritarren parte-hartzea eta jasangarritasuna erdigunean jarriz.
Badia bizi-bizi
Pasealekuak, atseden guneak eta itsasertzeko espazio bizigarriak indartzen ari dira. Helburua da portuaren jarduera eta eguneroko bizitza modu orekatuan uztartzea, barrutien arteko loturak sendotuz.
Mugikortasun jasangarria
Barrutien arteko oinezko eta bizikleta-ardatzak sendotuko dira,
- segurtasuna hobetuz,
- mugikortasun erraza eta jasangarria bultzatuz.
Natura eta klima
Tokiko biodibertsitatea eta berdeguneak zaintzeko neurriak garatzen ari dira:
- itzal-guneak,
- iturriak,
- hiri-berde azpiegiturak,
- eta klima-aldaketaren ondorioetara egokitzeko ekintzak.
Parte-hartzea
Herritarren ekarpenak eta parte-hartzeko aukerak zabalik daude, barrutiz barruti, badia eta ingurua hobetzeko ideia eta ekimenak partekatzeko.
2. Kontserbazio Bereziko Eremuak
Natura 2000 sareko altxorrak: Jaizkibel eta Ulia
Pasaian Natura 2000 sareko bi gune nagusi daude: Jaizkibel eta Ulia. Biak dira balio ekologiko handiko eremuak, itsaslabar ikusgarriak eta fauna zein flora berezia gordetzen dituztenak. Ingurune horiek aukera ematen dute natura modu bakar eta berezian ezagutzeko eta gozatzeko.
Zergatik dira garrantzitsuak?
Natura 2000 sareko eremuak zaintzea funtsezkoa da:
- Biodibertsitatea babesteko: espezie mehatxatuak eta habitat bereziak kontserbatu eta sendotzen dira.
- Klima-aldaketaren aurrean erresilientzia handitzeko: ekosistema osasuntsuek hobeto jasaten dituzte klima-aldaketaren ondorioak.
Bisitarientzako jarraibideak
Eremu natural horiek modu arduratsuan bisitatzeko, honako gomendio hauek jarraitzea eskatzen da:
- Ibilbide seinaleei jarraitu
- Zaborrik ez utzi eta sortutakoa beti jasotzea
- Sua egitea debekatuta dago
- Fauna eta flora ez asaldatzea, isiltasuna eta distantzia mantenduz
Helburua da natura gozatzeko aukera eta kontserbazioa bermatzea, biak uztartuta.
Kudeaketa aktiboa
Jaizkibel eta Ulia zaintzeko, honako lanak egiten ari dira:
- Espezie inbaditzaileen kontrola
- Habitatak leheneratzeko jarduerak
- Interpretazio eta sentsibilizazio jarduerak bisitarientzat
Ekintza hauek guztiek ekosistemak osasuntsu mantentzen eta biodibertsitatea babesten laguntzen dute.
Kontserbazio Bereziko Eremua (KBE), zer da?
Kontserbazio Bereziko Eremua (KBE), zer da?
Kontserbazio Bereziko Eremua (KBE) garrantzi komunitarioko leku bat da, administrazioak izendatua. Helburu nagusia hauxe da:
- bertako habitat eta espezieak egoera onean mantentzea edo
- egoera hori berreskuratzea, behar diren zaintza- eta kudeaketa-neurriak aplikatuz.
Jaizkibel
Itsaslabarretako muga bizia
Pasabide garrantzitsua da hegazti itsastarrentzat: aliotak, ekaitz-txori handia, ekaitz-txori txikia, txenada gorrizta eta antxeta burubeltza, besteak beste. Itsas labarretan kaio hanka horiek eta kaio ilunek kolonia bat osatzen dute.
Jaizkibel mendiak kostalde basati eta eder bat gordetzen du, geologia berezia eta biodibertsitate oparoa uztartuz. Ibilbide seinaleen bidez, begiratokiak eta itsaslabarrak arduraz ezagut daitezke. Kontserbazio-neurriek paisaia eta espezieak babestea dute helburu, bisitariek naturaz gozatzen duten bitartean.
- Ibilbideak eta begiratokiak: kostaldeko ibilbide seinaleak, ikuspegi panoramikoekin.
- Kontserbazioa: habitat bereziak, espezie mehatxatuak eta kudeaketa partekatua.
- Aholkuak: oinetako egokiak, haizea eta eguraldi aldakorra kontuan; aztarna ekologikoa minimizatu.
Ulia
Hiria eta naturaren arteko zubia
Itsaslabar ikusgarriak eta interes geologikoa duten formazioak. Espezie intesgarrien artean, ekaitz-txori arrunta, belatz handia eta Armeria euskadiensis edo Iris latifolia landareak daude.
Ulia-Pasaiako Landa Parkea aisialdirako eta ingurumen-hezkuntzarako eremu nagusia da. Ibilbide errazak eta ikuspegi zabalak eskaintzen ditu, familientzat egokiak. Kudeaketa partekatuaren bidez, biodibertsitatea eta ondarea zaintzen dira; bisitariei jarraibide sinpleak eskaintzen zaizkie natura arduraz gozatzeko.
- Ibilbide errazak: familientzako bideak, begiratoki eta atseden guneekin.
- Hezkuntza: naturaren interpretazioa eta hezkuntza jarduerak.
- Zaintza: baso-kudeaketa, inbaditzaileen kontrola eta habitaten mantentzea.
Mater Ontzi Museo Ekoaktiboa
Itsas ondarea eta ingurumen-hezkuntza Pasaiako bihotzean
Pasaia San Pedron dagoen MATER atunontzi historikoa Pasaiako ikurretako bat da. Ontzia museo ekoaktibo bihurtuta dago gaur egun, eta ingurumen-hezkuntza, itsas ondarea eta jasangarritasuna uztartzen ditu. Itsas kulturaren transmisiorako eta ingurumenaren aldeko sentsibilizaziorako espazio paregabea da.
Familientzat, eskoletarako eta taldeentzat aproposa, MATERrek aukera ematen du itsasoarekiko lotura modu errespetuzkoan eta esperientzian oinarrituta bizitzeko.
Zer eskaintzen du MATERrek?
Bisita esperientziala
Ontzi barrutik eta kanpotik egindako ibilbide gidatuak, honakoak ezagutzeko:
- ontziaren egitura eta funtzionamendua,
- arrantza tradizionalaren tresnak eta teknikak,
- tripulazioaren eguneroko bizimodua.
Hezkuntza eta tailerrak
Praktikan oinarritutako jarduerak, besteak beste:
- itsas biodibertsitatea eta habitatak,
- plastikoen arazoa eta hondakinen inpaktua,
- kontsumo arduratsua eta itsas baliabideen zaintza.
Komunitatea eta ekintza eraldatzaileak
MATERrek tokiko eragileekin elkarlanean egiten du lan, honako ekimenak sustatuz:
- boluntariotza-jarduerak,
- kostalde eta badia garbitzeko kanpainak,
- kontzientziazio sozialeko programak.