Pasaiako Udaleku Irekiek, Udaleko Haur, Nerabe eta Gazteria Sailak antolatutakoek, 320 haur hartu dituzte aurten, hilabete osoan udalerriko 4 barrutietan programatutako jarduera ugariez gozatzen ari direnak.

Udalekuak alderdi pedagogikotik berritzaileak dira, izan ere gaikako ardatzetan oinarrituta, jarduerak elkarrekin lotuz garatzen ari dira.

Aurten, ardatz tematiko nagusia kulturartekotasuna da, eta horren erakusgarri dira haur pasaiarrak. Hala, Irei piratak, Tostabeltz itsasontzian munduan barrena nabigatzen ibiltzen denak, leku ezezagunak aurkitzen eta lagun berriak egiten, astero botila bat bidaltzen die haurrei, beren abenturak kontatzen dizkien karta batekin, eta bisitatzen duen kontinente bakoitzarekin lotutako era guztietako jolasak eta jarduerak planteatzen dizkie.

Amerikan: Brasil, Ekuador, Mexiko eta Txile bisitatuko ditu. Asian: Txina, Singapur, India, Pakistan eta Maldivas. Ozeanian: Zeelanda Berria, Australia, Tasmania eta Papua-Ginea Berria. Afrikan: Egipto, Madagascar, Nigeria eta Maroko. Haurrak, adinaren arabera, jolas eta tailer berriak ezagutzen ari dira.  

Jarduera horiez gain, lau urtetik gorako haurrak irteerak eta txangoak egiten ari dira: Hondarribiko hondartzara, igerilekura, Zientziaren Museora, Mater ekomuseo ontzira, etab. 

Udaleku Irekiek uztailaren 28ra arte jarraituko dute, eta orduan amaituko da egiten ari diren bidaia. 

Gainera, aurten, Pasaiako familia batzuekin uda pasatzera etorri diren haur saharar batzuek udaleku irekietan parte hartu dute.

41 begiralek, barrutietako lau koordinatzailek, Udaleku Irekietako zuzendariak eta enpresako arduradunek osatutako taldea dedikazio eta hezkuntza-kalitate handiz ari da udaleku irekiak garatzen, Pasaiako Haur, Nerabe eta Gazteria Sailarekin lankidetzan.