Altza eta Galtzaraborda arteko trenbide-pasabide berria ostiral honetan, uztailaren 17an, inauguratu da ofizialki, Altza eta Pasai Antxo artean egindako ekitaldi instituzional batean. Larunbat honetatik (uztailak 18) aurrera, herritarrek trenen mugikortasunerako aurrerapen garrantzitsua suposatzen duen azpiegitura erabili ahal izango dute.

Pasaiako Udalaren izenean, Teo Alberro alkatea, Mikel Garcia Antxoko alkateordea eta Udalean ordezkaritza duten alderdi politiko guztietako ordezkariak izan dira: Laura Ré (EH Bildu), Julen Rodríguez (Podemos), Loreto Osa (EAJ-PNV) eta Lore Suárez (PSE-EE).

Lurpeko saihesbide berriak, 2,1 kilometrokoa eta bide bikoitzekoa, Altza, Pasai Antxoko geltoki berria eta Galtzaraborda lotzen ditu, orain arte Altzan zegoen zaku-hondoa kenduz. Horri esker, topo zerbitzuak nabarmen handituko ditu bere maiztasunak: bai Altzan, bai Pasai Antxoko geltoki berrian, 7,5 minutuero izango dira trenak, eta, gainera, eguneko zirkulazio kopurua handitu egingo da.

Gainazalean ere bizi den eraldaketa

Pasaiarentzat, lurpeko geltoki berria martxan jartzeak trenbide-zerbitzua hobetzea baino askoz gehiago suposatzen du. Saihesbidea martxan jartzeak aukera ematen du, halaber, Antxoko bizilagunek luzaroan itxarondako eta aldarrikatutako herri-eraldaketari ekiteko.

Topoa lurpera behin betiko eraman izanari esker, trenbideko biaduktu historikoa eraitsi ahal izango da, azpiegitura horrek barrutian izan duen inpaktuagatik hainbat hamarkadatan auzotarrek egindako aldarrikapen historikoa. Desagertze horrek udalerrirako lekua berreskuratzea, hiri-integrazioa hobetzea eta Antxoko hainbat punturen arteko lotura indartzea ahalbidetuko du.

Eraldaketa horri gehitu behar zaio Gure Zumardia, lurpeko geltokiaren gainean dagoen plaza berria, behin betiko ireki izana. Espazio publiko hori Pasaiako Udalak abian jarritako partaidetza-prozesuan oinarrituta diseinatu da; prozesu horren bidez, bizilagunek ingurune berriaren erabilerak eta ezaugarriak zehaztu ahal izan zituzten.

Teo Alberro Pasaiako alkateak nabarmendu duenez, "gaur ez dugu trenbide-azpiegitura bat bakarrik inauguratu; Antxorako etapa berri bat inauguratu dugu. Mugikortasuna hobetzea garrantzitsua zen, baina azaleran gertatzen den guztia ere garrantzitsua da: pertsonentzako espazioak berreskuratzea, barrera historiko bat kentzea eta udalerri atseginago eta kohesionatuago bat eraikitzen jarraitzea ".

Halaber, azpimarratu duenez, "Gure Zumardiak irudikatzen du Udaletik defendatzen dugun lan egiteko modua: herritarrak entzunez diseinatutako eta Pasaian bizi direnen eguneroko bizitza hobetzeko pentsatutako espazioa. Topoaren eraldaketa lurpean hasten da, baina bere onurak, batez ere, gure kale eta plazetan ikusiko dira".