San Pedroko biribilgunean geldialdia egiten duten autobus publikoek sortutako eragozpenei buruzko eskaera bidali dio Udalak Gipuzkoako Foru Aldundiko Mugikortasuneko, Turismoko eta Lurralde Antolaketako Departamentuari. Eskaera honek Udal Gobernuak antolatutako Barruti Batzarren ekimenean du jatorria, zehazki, San Pedroko saioan herritarrek egindako eskaeretan.

Miren Murua Arrizabalaga San Pedroko alkateordeak adierazi duenez, "topaketa parte-hartzaile honetan zehar, bizilagunak kezkatuta agertu ziren ibilbide baten amaieraren eta hurrengoaren hasieraren artean motorra piztuta denbora luzez geldirik egoten diren autobusengatik, eta horrek zarata deserosoak eta beharrezkoak ez diren emisio kutsatzaileak eragiten ditu, inguruneko bizi-kalitateari, bizilagunen ongizateari eta airearen kalitateari eragiten dietenak".

Bizilagunen eskari horri erantzunez, Udalak Aldundiari eskatu dio egoera horrek ingurumenean eta akustikan duen eragina murrizteko neurriak aztertu eta bultzatzeko. "Planteatu ditugun neurrien artean daude Pasaian eta, zehazki, San Pedron jarduten duen autobus-flota pixkanaka elektrifikatzea, geldialdi luzeetan motorrak behar ez duen funtzionamendua saihesteko protokoloak ezartzea, eta etorkizuneko lizitazioetan eta garraio publikoaren emakidetan ingurumen-irizpideak txertatzea".

Eskaera hori Pasaiako Udalak jasangarritasun energetikoaren, trantsizio energetikoaren eta klima-aldaketaren aurkako borrokaren arloan dituen helburu eta estrategietan ere kokatzen da, garraioaren deskarbonizazioaren eta mugikortasun jasangarriagoa eta emisio gutxikoak bultzatzearen alde egiten baitute.

Ekimen hau herritarrek parte hartzeko sorturiko forotik, Barruti batzarretatik, sortu da. Batzar horiei esker, Udalak zuzenean jaso ditzake Pasaiako barrutietako bizilagunen beharrak eta kezkak, eta administrazio eskudunei helarazi, pasaitarren proposamenak udalerriko bizi-kalitatea hobetzeko jarduera zehatz bihurtuz.