Pasaia Musikal Pasaiako Udal Musika Fundazio Publikoak eta Musikene Euskal Herriko Goi Mailako Musika Ikastegiak lankidetza-hitzarmen bat sinatu dute Musikeneren Donostiako egoitzan egindako ekitaldi batean. Pasaiako musika-prestakuntza indartzeko urrats garrantzitsua da hitzarmena; eta bertan izan ziren Kulturako zinegotzi eta fundazioko presidente Aitor Brion, Pasaiako zuzendari Musikal Gorka Miranda eta Musikeneko zuzendari nagusi Miren Iñarga Echeverria.

Akordio horrek lankidetza-esparru egonkor bat ezartzen du bi erakundeen artean, musika-irakaskuntzan bikaintasuna sustatzeko, prestakuntza- eta dibulgazio-proiektu bateratuak bultzatzeko eta Musikeneren ezagutza eta esperientzia Pasaiako kultura- eta hezkuntza-sarera hurbiltzeko.

Aitor Brionek akordioaren izaera estrategikoa azpimarratu du: "Akordio honekin beste urrats bat egin dugu Pasaian kalitatezko musika-hezkuntza sendotzeko bidean. Musikeneren prestigioa duen erakunde batekin lankidetzan aritzeak aukera emango digu gure ikasle eta irakasleei garapen-aukera berriak eskaintzeko eta gure ikasgelak erreferentziako eredu pedagogiko batera irekitzeko ".

Bestalde, Gorka Miranda Pasaia Musikaleko zuzendariak hitzarmen horrek fundazioaren hezkuntza-komunitatean izango duen eragin positiboa azpimarratu du: "Hitzarmen honek zuzenean lotzen gaitu musika-irakaskuntzaren goreneko mailarekin, eta gure prestakuntza-eskaintza aberasteko bide bat eskaintzen digu. Ilusio handia dugu aliantza horrek gure ikasleentzat, irakasle-taldearentzat eta Pasaiako kultura-bizitzarentzat izango duen eraginagatik".

Miren Iñarga Echeverriak, Musikeneko zuzendari nagusiak, hitzarmena  sinatu izana goraipatu du, eta Musikenek musika-ezagutza euskal gizarte osora hurbiltzeko duen bokazioaren barruankokatu du: "Musikenerentzat funtsezkoa da lurraldeko kultura- eta hezkuntza-eragileekin lankidetzan aritzea. Pasaia Musikalek lan eredugarria egiten du tokiko eremuan, eta pozik gaude gure baliabideekin, esperientziarekin eta hezkuntza-ikuspegiarekin hazten lagundu ahal izateaz".

Ikuspegi partekatua duen aliantza

Sinatutako hitzarmenak hainbat lankidetza-ildo jasotzen ditu, eta horien artean nabarmentzekoak dira prestakuntza-jardueren multzoa diseinatzea, Musikeneren aholkularitza pedagogikoa eta artistikoa, ikasle eta irakasleen egoitzak garatzea, eta Pasaian kontzertuak, topaketak eta jardunaldiak antolatzea.

Pasaia Musikalek, Juanje Neira Udal Musika eta Dantza Eskolaren bidez, musika- eta dantza-irakaskuntza du helburu nagusi, ikuspegi integratzaile, ireki eta tokiko errotze sendoko batetik. Akordio hori bat dator udal-fundazioaren helburu estrategikoekin, eta helburu horiek honako hauek dira: kalitatezko prestakuntza artistikorako sarbidea bermatzea, tokiko talentua sustatzea eta udalerriko bizitza kulturala dinamizatzea.

Gainera, udal-fundazio gisa duen konpromisoan, Pasaia Musikalek helburu berberak dituzten beste erakunde batzuekin lankidetzan aritzearen aldeko apustua egiten du, betiere aliantza horien onurak ikasleen mesederako izan daitezen, haien prestakuntza baita haien jardueraren lehentasunezko helburua.

Musikene, bestalde, Euskadiko erreferentziako goi-mailako zentroa da musika-prestakuntza aurreratuan. Bikaintasun teknikoa eta berrikuntza pedagogikoa uztartzen dituen eskaintza akademikoa du, eta inplikazio handia du inguruko kultura-garapenarekin.

Lankidetza horrekin, bi erakundeek musikarekiko konpromisoa indartzen dute, eraldaketa sozialerako, garapen pertsonalerako eta elkar aberasteko tresna gisa.