Ikasturte berriarekin, Pasaiako liburutegietako euskarazko Irakurketa Kluba martxan hasiko da urrian. Urtero bezala, saioak irekiak eta doakoak izango dira.

Hainbat estilo jorratzen dituzten liburuak landuko dituzte urtean zehar, batzuk euskal idazleek idatzitakoak eta beste batzuk itzulpenak direnak. Saio guztiak 19:45ean izango dira Pasaiako liburutegietan eta moderatzaile lanetan Xabier Etxaniz Rojo idazle pasaitarra arituko da.

Urriaren 13an ospatuko den lehen saioan Adania Shibli idazlearen Detaile xume bat liburua landuko dute Antxoko liburutegian.

Pasaitarrek gogoan izan behar dute Irakurketa Klubean parte hartzeko, egokiena liburua aldez aurretik irakurtzea dela, egun horretan elkarrekin eta moderatzailearen laguntzarekin solastatzeko.

Urte berezia klubarentzat

Aurtengo ikasturtean Irakurketa Klubak 10 urte beteko ditu, eta hori ospatzeko hainbat ekitaldi egingo dituzte. Lehenengoa abenduaren 12an, Miren Agur Meabe idazlearekin batera Ubera liburutegian.

Izena emateko eta edozein zalantza argitzeko  liburutegiak@pasaia.net helbidera idatzi daiteke mezua.

Animatu eta gerturatu zaitez literaturaz gozatzera!

                          2025-2026 IKASTURTEKO EGUTEGIA