Pasaiako Udalean ordezkaritza duten talde politiko guztiek –EH Bildu, Ahal Dugu-Aliantza Berdea, EAJ, eta PSE-EE– adierazpen instituzionala sinatu dute gaur, Pasaiako Udalak Herri Babesarearekin bat egin dezan. Giza eskubideen defendatzaileak babesteko euskal sare horrek laguntza ematen die arriskuan dauden ekintzaileei, eta udal-erakundeen eta giza eskubideen aldeko nazioarteko erakundeen arteko ahaleginak batzen ditu horretarako.

Adierazpen instituzionalak tokiko ekintza txikiek ahalegin eta aldaketa handietan duten garrantzia azpimarratzen du, Teo Alberro Bilbao alkatearen hitzetan: "Gure betebeharra da, udal eremutik, giza eskubideak defendatzen dituztenentzako ingurune seguruen alde egitea, haien borrokak ikusarazteko eta modu aktiboan babesteko". Atxikimendu hau bide luzeago baten lehen urratsa da, non Pasaia giza eskubideen defendatzaileentzako gune seguru eta solidario gisa finkatu nahi den, justizia sozialaren aldeko nazioarteko borrokekin lerrokatuz.

Azaroaren 13ko jardunaldia

Lankidetza horren barruan, Udalak iragarri du nazioarteko hiru ekintzaile etorriko direla azaroaren 13an, Giza Eskubideen Defendatzaileen VI. Foro Ibiltariaren esparruan. Gonbidatutako defendatzaileak hauek dira: Amaranta Margarita Portillo Peña, Salvadorko "Las Mélidas" erakunde feministako kidea; Diana Carolina Maradiaga Amador, Hondurasko Giza Eskubideen Defendatzaileen Sare Nazionaleko kidea; eta Yussi, feminismoaren aldeko ekintzaile palestinarra; azken horren izena gezurrezkoa da, bere nortasuna eta segurtasuna babesteko.

Pasaian egingo den jardunaldian ekintzaileei harrera ofiziala egingo zaie udaletxean, zeremonia instituzional batean. Ondoren, tokiko elkarte feministekin bazkalduko dute fundazioko nahiz udaleko ordezkariek; berdintasunaren eta giza eskubideen alde borrokatzen dutenen arteko topagunea izango da hori.

Arratsaldean defendatzaileek Bekoz Beko elkarte feministak Pasai Antxon duen lokala bisitatuko dute. Bertan, elkarte horrek udalerriko emakumeen eskubideen alde egiten duen lana ezagutuko dute. Amaitzeko, Trintxerpen topaketa bat egingo dute herriko emakumeekin, eta haiek Pasaiako komunitatean giza eskubideen alde egiten duten lana partekatuko dute aktibistekin.

Jarduera horiekin, Pasaiako Udalak Herri Babesarearekin lankidetza estuan aritzeko konpromisoa berretsi nahi du, giza eskubideen defendatzaileentzako laguntza eta sentsibilizazio guneak sortuz. Atxikimendu hau ibilbide luzeko harreman baten hasiera da, eta ibilbide horretan Pasaiak bere papera indartuko du oinarrizko eskubideen babesaren alde, tokiko ahaleginak nazioarteko borrokekin lerrokatuz.

ADIERAZPEN INSTITUZIONALA