Pasaiako alkateak hitzarmena sinatu du aste honetan Eusko Jaurlaritzako Lurralde Plangintza, Etxebizitza eta Garraioetako Sailarekin eta Hiri Agenda Ministerioarekin. Horren bidez, 5,8 milioi euroko dirulaguntza bideratuko da Andonaegi auzoko hiri-birgaitze integralerako proiektua indartzeko, energia-efizientziaren arloan, Estatuaren Suspertze, Eraldatze eta Erresilientzia Mekanismoko Next Generation EU funtsen bidez.

Laguntza ekonomiko hau, dagoeneko onartutako 8 milioi euroko dirulaguntzari batuko zaio, eta honen helburua izango da auzoko bizitegi-eraikinak birgaitzea, energia ez-berriztagarrian gastua % 30 murriztea lortzeko. Gainera, honen zati bat auzoaren urbanizazio-lanak egiteko erabili ahal izango du udalak.

Pasaiako Udaleko Hirigintza Saila dirulaguntza lerro berriaren oinarriak lantzen ari da dagoeneko, eta datozen asteetan emango du jakitera, proiektu horretarako gaitu den auzo-bulegoaren bidez, nola egin behar dituzten eskaerak eragindako bizitegi-eraikinetako erkidegoek.

Amaitzeko, gogorarazi nahi dugu Andonaegi izan dela hiri-birgaitze programan sartu den lehenengo auzoetako bat eta jarduketak Igeldo, Oiartzun, Andonaegi, Bidasoa eta Urgull kaleetan 200 etxebizitza inguru hartzen dituzten 20 ataritan egingo direla.