Laurak Bat Merkataritza, Ostalaritza eta Zerbitzuen Elkarteak, Pasaiako Udalarekin lankidetzan, "Laurak Bat" azoka antolatu du, datorren larunbatean, otsailak 28. 
Azoka 11:00etatik 20:00etara egingo da, etenik gabe, Gernika plazan jarriko den karpa batean, Euskadi etorbideko 13. zenbakiaren parean, Trintxerpen.

Mari Carmen Mogilnicki Laurak Bateko presidenteak honako hau adierazi du: "azoka bat sortu dugu lelo honekin: “Herrian erosteak herrigintza bultzatzen du. Azoka hau hurbileko festa izatea nahi dugu. Pasaiak aparteko giza kalitatea eta kalitate profesionala duten merkataritza, ostalaritza eta zerbitzuak ditu, eta hemen kontsumitzeak etorkizun bizia bermatzen du gure kaleetarako".

Mikel García Peñil Pasaiako merkataritzaz arduratzen den zinegotziak honako hau nabarmendu du: «Udalaren ustez, tokiko merkataritza eta ostalaritza ardatz estrategikoa dira gure udalerriaren gizarte-kohesiorako eta dinamismo ekonomikorako. Pasaian egiten den erosketa bakoitza inbertsio zuzena da enpleguan, gure kaleetako bizitzan eta komunitatean".

Era berean, honako hau azpimarratu du: «Laurak Bat azokak, besteak beste, gure merkataritza- eta ostalaritza-eskaintzaren kalitatea eta aniztasuna ikusarazteaz gain, bizilagunak eta profesionalak elkartzeko gune bat sortzen du, hurbileko merkataritzaren ezaugarri den konfiantza-lotura indartuz». Zinegotziak honako hau gaineratu du: «Tokiko merkataritzaren aldeko apustua egitea eredu jasangarriago baten alde egitea ere bada, joan-etorriak murrizten dituena, ekonomia zirkularra bultzatzen duena eta gure auzoetako berezko nortasunari eusten diona».

Zer aurkituko duzu azokan?

Tokiko merkataritza, elkartearen informazioa, eskaintza bereziak eta hurbileko merkataritzak bakarrik eskain dezakeen tratu pertsonalizatua. Gainera, taberna-barra bat egongo da, Pasaian kontsumitzen den bitartean une atsegin batez gozatzeko.
Laurak Bat elkarteak eta Pasaiako Udalak jardunaldi honetan parte hartzera animatzen dituzte pasaitar guztiak, eta mezu hau azpimarratzen dute: udalerrian kontsumitzea kalitatearen, jasangarritasunaren eta ongizate partekatuaren aldeko apustua egitea da.

Saltoki hauek hartuko dute parte: 

• LIRAIN Ileapaindegia
• MURO Nautika
• MAPFRE Aseguruak
• LOREAK Loredenda
• SUAI Dekorazioa
• NORAI Kafetegi eta Okindegia
• MIMOS Taberna