Musikaz Blairen XVI. edizioa proposamen sendo bat berresteko asmoarekin dator: musika eta dantza herritarrengana hurbiltzea, adierazpen artistiko horiek ezohiko espazio publikoetara eramanez. Ekitaldia maiatzaren 29tik ekainaren 1era egingo da, eta helburu nagusia da Trintxerpe dinamizatzea, kaleak agertoki bizi eta parte-hartzaile bihurtuz, Serafin Esnaola plaza jardueraren gune nagusia izanik.

PROGRAMA

Aitor Brion Kultura zinegotziak adierazi duenez, "Pasaiako Udal Gobernuak musika eta euskal dantza babesten ditu. Horrelako ekitaldiek harrotasunez betetzen gaituzte, gure bizitza kulturalean pisu handiena duten bi diziplina artistiko balioesten dituztelako."

Bestalde, Gorka Miranda Pasaia Musikal Udal Fundazioko zuzendariak gaineratu duenez, "Musikaz Blai ekimenak balio kultural ukaezina du. Bere goranzko ibilbideak gure inguruko erreferentzia-ziklo gisa sendotu du."

Juanje Neira Ilunbe Elkarteko presidentearentzat "hunkigarria da Musikaz Blai nola hazi den ikustea, Pasaian proiekzio handiena duen zikloetako bat bihurtu arte. Zikloko musika programazioaren, txistularien alardearen eta euskal dantza txapelketaren artean sortutako senidetasunak programa osoa aberasten lagundu du, eta Gipuzkoa osoko ziklo garrantzitsuenetakotzat finkatzen."

"Txistularien alardeak ilusio berezia egiten digu aurten, Pasaia udalerri gisa sortu zeneko 220. urteurrenarekin bat egiten baitu. Oso egun berezia izango da, kutsu pasaitarra duen omenaldi musikala”, zehaztu du Kulturako zinegotziak.

Josu Elberdinek, Ilunbeko txistularien izenean, honako hau adierazi du: "Mari Jose Gaztelumendiren, alardearen alma materraren, lan nekaezina azpimarratu nahi dut. Datorren ekainaren 1ean berriz ere txistularien buru izango da. Hemengo saioa ez da, gainera, euskal hiriburuetan egiten direnak baino gutxiago. Gure musikari gehienek zaletasun hori beren lanbideekin uztartzen dute, eta haien eskuzabaltasunak merezi du aitortza. Horregatik, funtsezkoa da erakunde publikoek ez ahaztea ekimen horiek babesa behar dutela."

Musikaz Blai Illumbe Musika Elkarteak antolatzen du, Pasaia Musikal Udal Musika Fundazio Publikoaren eta Pasaiako Udalaren babesarekin.

Horrez gain, Juanje Neira Pasaiako Udal Musika eta Dantza Eskolaren, Euskal Herriko Txistulari Elkartearen eta Gipuzkoako Euskal Dantzarien Biltzarraren laguntza ere badu.

"Pasaiako Udalak adierazpen artistiko horiek sustatzen jarraituko du lau barrutietan, bereziki gazteen artean, haiengan baitago udalerriaren etorkizun artistikoa” amaitu du Brionek.