Web edukia bistaratu

TOKIKO AGENDA 21

ZER DA TOKIKO AGENDA 21?

Tokiko Agenda 21 tresna estrategiko bat da udalerriaren garapen iraunkorrerako bidea markatzen duena eta eman beharreko pausoak definitzen dituena. Ingurumen-, ekonomia- eta gizarte-politikak modu integralean jorratzen ditu; eta horretarako, jakina, herritarren partaidetza elementu nahitaezkoa da.

Pasaiak Tokiko Agenda 21aren testuinguruan 2004.urtean diagnostikoa egin zuen, Oarsoaldeko Garapen Agentziaren  laguntzarekin, baina bere horretan geratu zen eta ez zen Ekintza Planik garatu.

Orain, 2017an, Pasaiako Udalak, Tokiko Agenda 21eko Ekintza Plana egiteko prozesua abian jarri du. Horretarako, lehenik, diagnostikoa egingo da eta ondoren Ekintza Plana definituko da.

FASEAK

1. fasea: MARTXAN JARTZEA

Fase honetan zehar Udalak definitu egingo du prozesua nola izango den: Zuek, herritarrok, nola parte hartuko duzuen prozesuan zehar, udal teknikariek eta politikariek nola hartuko duten parte, zein arlo landuko diren, nola koordinatuko den gainerako proiektuekin…

2017 ko Maiatza – Ekaina

2. fasea: DIAGNOSTIKOA

Fase honetan, udalerriaren egungo argazkia definituko da. Horretarako eskuragarri dagoen informazio estatistikoa eta lehendik dauden plan eta programak aztertuko dira.
Gainera, udal teknikariak udalerria hobetzeko lanean dabiltza eta askok herritarrekin harreman zuzena dute, horregatik fase honetan garrantzitsua da beraien ikuspegia biltzea. Horrez gain, zuok, herritarrok zarete udalerria ondoen ezagutzen duzuenak, eta beraz, zuen parte hartzea ere beharrezkoa izango dugu fase honetan. 
Zein arlo landuko dira? Inguru naturala, mugikortasuna, ura, energia, hondakinak, ingurumenaren kalitatea, immigrazioa, berdintasuna, gazteria, lan merkatua, garapen ekonomikoa…

2017ko Ekaina-2018ko Urtarrila

3. fasea: FORMULAZIO ESTRATEGIKOA

NOLAKOA NAHI DUGU IZATEA PASAIA ETORKIZUNEAN? Fase honetan galdera horri erantzungo diogu eta irudikatzen dugun Pasaia hori lortzeko xedeak eta helburuak ezarriko ditugu

2018ko otsaila

4. fasea: EKINTZA PLANA

Fase hau oraindik definitu gabe dago, baina 2018.urtean martxan jartzea aurreikusten da.
Ekintza Planean jasoko diren ekintzek formulazio estrategikoan definitutako Pasaia lortzeko egingo dute lan, eta Ildo Estrategiko, Programa eta Ekintzetan egituratuko da Tokiko Agenda 21eko Ekintza Plana.

2018 zehar

HERRITARREN PARTE-HARTZEA

Prozesuan zehar herritarren ekarpenak kontuan edukitzea beharrezkotzat jotzen dugu. Hori dela eta, hasiera-hasieratik pasaitarren iritzia jasotzeko hainbat bilera antolatu dira. 2017Ko urrian 3 lan saio egin ziren, eta saio horietan datozen urteetarako zer-nolako Pasaia nahi dugun pentsatzeko aukera izan genuen: gure kaleak nolakoak izatea nahi dugun; gure haur, heldu eta gazteek zein zerbitzu beharko dituzten; gure ingurunea nolakoa izatea nahi dugun; energia kontsumoa nola murriztu dezakegun; edo gure komertzio eta enpresetako enplegua eta dinamismoa nola bultza dezakegun.

Lan saio horietan bi gai nabarmendu ziren, nahiz eta beste gai askoren baitan ere eztabaidatu zen: alde batetik, udalerriaren identitate falta aipatu zen, eta hori indartzeko barrutien arteko mugikortasuna hobetu beharra. Bestetik, portuaren eta herriaren arteko harremana hobetzeko beharra aipatu zen. 

Herritarrek egindako ekarpenak lehenengo fasean idatzitako diagnostikoan txertatu dira.

DOKUMENTUAK

 

Diagnostikoa

PDF 8,4 Mb

 

Formulazio estrategikoa

PDF 0,6 Mb

 

AURKEZPENA

PDF 2,2 Mb